Pamuno sang Bacolod TraffiC Authority Office nga si Police Major Junjie Liba ang bukas sa ginaduso nga pagpang-usisa sa konseho angut sa gina-alegar korapsyon sa iya opisina.
Antes pa man nagluntad ang gamo sa tunga sang katapo sang BTAO kag ni Councilor Al Victor Espino may tatlo na ka mga traffic personnel nga napahalin si Liba tungod man sang gina alegar pagpangilkil.
Nalakip diri ang traffic enforcer nga sadto ginsuholan sang mag-asawa nga nadakpan wala nagasuksok sang helmet.
Ginsiling ni Liba nga pamatuod ini sang seryoso niya nga kampanya kontra korapsyon amo nga bukas man siya sa ginaduso nga inquiry ni Councilor Espino agud mapadalman ang alegasyon sang korapsyon sa BTAO.
Si Espino ang nagpadulong sang nagligad nga semana sa BTAO office agud ipalab-ot kay Liba ang reklamo sang isa ka motorcycle rider nga gin alegar ginkilkilan sang empleyado sang BTAO para lang mapa gwa ang iya na-impound nga motor.
Pero ginreklamo man si Espino sang BTAO staff nga si Abner Salvallon nga nag alegar nga iya ginbuyayaw kag ginpahug nga patyon.
Gindugang man nanday Liba kag Salvallon nga armado sang pusil ang konsehal sang magsulong sa sulod sang BCPO compound.