Pila ka bahin sang Bacolod, Talisay kag Silay ang naka eksperyensya sang inoras nga brownout kahapon bangud sang malain nga panahon.
Las dos sang kaagahon kahapon sang matumba ang puno sang sambag sa Puentevella Subdivision, Barangay Taculing sa Bacolod bangud sang mabaskug nga hangin.
Nagtuga ini sang brownout sa lugar.
Las diyes kwarenta naman sang aga natumba man ang puno sang gemilina sa barangay alijis nga nagtuga man sang brownout sa lugar.
Nagresponde ang Emergency Response Team sang Bacolod City Disaster Risk Reduction and Management Office sa pag utod sang amo nga mga kahoy kag pagpatigayon sang clearing operations.
Makaduha man ka beses nga nag trip off ang Bacolod-Silay 69KV line sang Central Negros Electric Cooperative bangud sang mabaskug nga hangin.
Nagtuga ini sang brownout sa Burgos kag Mountain View feeders sang CENECO kag pati na sa siudad sang Talisay kag Silay.
Sa gab-i na nabalik ang kuryente sa pila ka bahin sang Talisay kag Silay.
Napuno naman sang reklamo gikan sa mga netizens ang official social media page sang CENECO bangud sang malawig nga inoras nga brownout.