Makita sa video ang lalaki nga nagabitin sa trusses sang covered court sang Barangay Carol-an sa Kabankalan City matapos makuryente, Martes sang gab-i.
Ang ini nga lalaki nga ginkilala kay alyas “Jayme” amo ang isa sa duha ka mga persona nga nakuryente.
Una nga nakuryente kag nahulog amo si alyas “Jemar”, 45-anyos, nga kapin duha ka dekada na nga electrician sang NOCECO, antes ini nagpungko bilang barangay kagawad.
Nagahiwat sang kapiyestahan ang Barangay Carol-an kag may yara sila sang ginapatigayon nga basketball game sa sulod sang plaza ugaling nagbrownout.
Sila ang nag-change power sa generator kag sang nagbalik na ang kuryente, tuyo kuntani sang kagawad nga ibalik sa main power ang ila electrical line, apang siya ang nakuryente.
Ang kagawad amo ang tag-iya sang gingamit nga sound system.
Matapos ma-rescue kag madala sa ospital ang kagawad, nagsaka naman si “Jayme” nga isa ka operator sang sound system, agud ibalik sa main power ang kuryente, ugaling siya ang nakuryente man.
Bangud sang insidente, ginpauntat na lamang ang kahiwatan sa nasambit nga covered court.
Sa karon, pareho na nga estable ang kondisyon sang kagawad kag sang operator sang sound system.*
[sibwp_form id=1]