Nagadangat sa isa ka million ka balut sa kada bulan ang demand sa Negros Occidental. Mga 700,000 diri ang kakulang kag luyag nga mapun-an sang probinsya.
Ini suno kay Negros Occidental Governor Eugenio Jose Lacson, nga nag paathag nga kasunod sang bird flu cases gikan sa Luzon, gin-untat sang probinsya ang pag pasulod sang mga wala naluto nga balut gikan sa sini nga mga lugar.
Ang ma produce lamang sang Negros Occidental yara sa 200,000 tubtob 300,000.
Gani, bilang isa sa mga tikang sang probinsya para mapun-an ang kakulang, may napulo ka mga association lakip na diri ang grupo sang mga former rebels – mga Kapatiran Chapters kag mga farmer association ang ginhatagan sang mga breeder ducks, tig isa ka unit sang incubator kag 12 ka bag sang duck feeds.
Ini higayon man nga mahatagan sang palangabuhian ang mga farmer beneficiaries kag Former Rebel associations.
Nalakip man ini sa food sufficiency initiatives sang Negros Occidental.
Dos milyones pesos ang balor sang proyekto. Kaina sang aga ginturn-over ini sa mga beneficiaries.