Gintuad kahapon ni Abang Lingkod Partylist Representative Stephen Paduano nga ginkasugtan na sang mga political leaders nga si Board Member Jose Benito Alonso ang mangin vice gubernatorial bet sa 2025.
Ginsiling naman ni Cadiz City Mayor Salvador Escalante, Jr., nga Secretary General sang United Negros Alliance nga may yara sang formal nga announcement nga buhaton ang partido angut diri, pero sa karon indi siya maka kumpirma ukon maka himutig nga si BM Alonso ang mangin vice gubernatorial bet nila.
“May formal announcement, indi ko ka confirm, indi man ko ka deny”, suno kay Escalante.
Sini nga Mayo mapat-od kun san-o magatipon ang UNegA para sa 2025 Elections suno kay Escalante. Damlag pa ginsiling ni Vice Governor Jeffrey Ferrer nga luyag niya magbalik sa 2025 sa 4th District bilang Congressman, bilang tal-os sa iya asawa nga si Representative Juliet Marie Ferrer nga karon yara sa iya last term. Ginsiling ni Paduano sa interview kahapon sa iya sang katapo sang media nga sang Christmas Party sang Philippine Councilor’s League nga gintambungan man sang pila ka mga alkalde sa probinsya kag ni Third District Representative Francisco Benitez nga siya ang nahatagan sang higayon nga mag endorso kay Alonso bilang vice gubernatorial bet upod kay Governor Eugenio Jose Lacson nga iya man nga gina suportahan. Ginhimutig man ni Paduano ang report nga siya ang maga papili bilang bise gobernador.