Padya para informant para nadakpan nga pugante ang ginapat-ud pa sang Bureau of Jail Management and Penology. Ini samtang nagapadayon pa ang manhunt operation sa isa sa lima nga pugante.
Ginpaidalom na sa 21 days isolation period ang isa sa lima ka mga pugante nga si Francisco Epogon makaligad nga siya ang nadakpan sang katapo sang Binalbagan PNP sa Barangay Amontay sang Hulyo 23.
Suno kay Atty. Jairus Dogelio, spokesperson sang Bureau of Jail Management and Penology, ila na ginapat-ud kun sino ang informant nga sarang magbaton sang kinse mil pesos nga padya sa liwat nga pagkadakop kay Epogon nga ginakabig katapo sang epogon robbery hold-up group.
Ang BJMP-6 ang nagtanyag sang kinse mil pesos nga reward para sa pagkatikma sang nabilin nga pugante nga si Alejandro Montoya.
Hunyo 29 sang nalagyo ang lima ka mga persons deprived of liberty sa Negros Occidental District Jail sa Barangay Tabunan siudad sang Bago.
Duha sa ila ang mag-utod nga Marvin kag Danilo Celeste nga lunsay napatay sa separado nga manhunt operation sang kapulisan kag BJMP.
Nadakpan naman sadto sang otoridad si Daniel Tamon sa banwa sang Murcia.
May dies mil pesos man nga reward ang BJMP 6 sa liwat nga pagkadakop sa iya.