Nagapanawagan ang obispo sang Diocese of San Carlos nga si Bishop Gerardo Alminaza sang peace talks sa tunga sang gobyerno kag New People’s Army angut sang sunod-sunod nga mga engkwentro kag insurgency killings sa Negros.
Ginsiling sang obispo nga ang solusyon sa madugay na nga away sa tunga sang gobyerno kag mga rebelde amo ang malinong kag matawhay nga pagsugilanon.
Dugang pa niya, madamo na nga kabuhi ang nadula kag mga tawhanon nga kinamatarong ang natapakan, rason nga kinahanglan na nga ma-istoryahan ini sang magtimbang nga bahin agud indi na magdangat pa sa pag-gamit sang armas.
Handa nga maghatag sang suporta ang simbahan apang siling ni Alminaza gobyerno mismo ang may kapasidad nga magduso sang amo nga peace talks.
Ini matapos nga nagpanawagan ang 3rd Infantry Division sang Philippine Army sa Commission on Human Rights nga magpatunga sa nagapadayon nga pagpamatay sang mga rebelde sa mga inosente nga mga sibilyan sa Negros.
Sa record sang Army, may yara sang 28 ka mga pagpamatay sa Negros ang gin-ako sang NPA humalin Marso sang tinalikdan nga tuig tubtob Pebrero 3 sini nga tuig.
Samtang, ginlunsar naman sang mga human rights advocates kaupod si Alminaza ang Manindigan Negros, isa ka Human Rights Alliance sa probinsya. Ini ang isa ka faith-based organization nga magabulig sa mga labing-kubos kag mga biktima sang inhustisya.
Pangunahan ini ni Rev. Fr. Arman Onion bilang chairperson kag ni Rev. Fr. Ben Duran bilang co-chairperson.*
[sibwp_form id=1]