Patay ang lalaki nga nagasakay sa bisekleta matapos mabungguan sang taxi sa national highway nga sakop sang Barangay Mabini sa banwa sang Valladolid, Lunes sang gab-i.
Ginsiling ni Police Lt. Celso Omega, deputy chief sang Valladolid PNP, posible nga wala makita sang taxi driver ang nagatabok nga biker bangud tuman ang pagbunok sang ulan sadto nga tion.
Suno sa mga nakakita, naga isi-isi ang agi sang biker nga gikan sa inom-inom.
Naabtan sang mga nagresponde nga kapulisan ang biktima nga nagahigda sa dalan kag may mga pilas sa ulo, samtang ang Toyota Avanza nga taxi ang nahulog sa kalog sa higad sang dalan.
Nag-gwa sa imbestigasyon nga ang taxi halin Valladolid proper kag pakadto Pulupandan.
Bangud sa kakulba sa iya safety, nagpasilong anay ang driver sang taxi nga si alyas “Bobby”, taga Pulupandan sa COMPAC station sa Crossing Pulupandan kag pagka-aga, siya ang nagsungka sa personnel sang Valladolid PNP.
“May ara na sila initial settlement. Ang pamilya indi naman interisado nga magpasaka sang kaso. Ang ila lang to nga i-sabton lang sang kompaniya ang burial expenses kay ti mga pigado gid sila kuno wala sila sang ikasarang nga ibayad sa punerarya kag ipalubong sa ila nga utod”, suno kay Omega.*
[sibwp_form id=1]