Nagkamustahanay kag nag areglohanay na sanday Kylie Montecado kag ang 18 anyos nga si Rolly Ray Alejo nga iya ginreklamu nagpainom sang tubig nga gikan sa sapa nga ginapaliguan sang karabaw matapos man ang inoras nila nga pag istoryahanay sa barangay hall sang Barangay Vista Alegre kaina sang aga.
Nagalaum si Montecado nga indi na liwaton ni Alejo ang iya ginhimu ukon himuon sang iban pa ang amo nga sahi sang prank.
Nagviral ang video kun diin makit an pa ang mga kaupdanan ni Alejo nga nagkinadlaw sang ginabasyahan sang tubig nga halin man sa sapa ang katapo sang LGBTQ biker nga nagdaug sa bike race sang Octobre 2.
Pero bisan ginpatawad na sang tagreklamu ang isa sa mga nangsasko sa iya, nakasugtan nga bayaran sang ginareklamu ang gasto sa laboratory test ni Montecado nga sadto nagbatyag sang panalakit sang tiyan sang mainom ang tubig sa sapa.
Magluwas sa barangay vista Alegre kun diin ginreklamu ang 18 anyos, natalana man sila nga maga atubangay liwat sang tagreklamu sa committee conference in aid of legislation nga ginpatawag sang konseho sang siudad.