Bidding para P8M nga drainage project ginpasuguran ni Mayor Albee Benitez agud masolusyunan na ang malawig nga problema sa baha sa Barangay 3 sa Bacolod.
Nagsugod na ang tig-ululan pero asta karon halos indi pa masolusyunan ang problema sa baha nga naga apekto sa mga taga Purok Nangka sa Barangay 3 kag kaiping sini nga mga barangay sa Bacolod.
Makapila na ka beses nga ginkay-o ang drainage system ilabi na sa dalan Gatuslao ugaling kada magbunok ang ulan, nagalab-ot gihapon ang tubig baha sa mga puluy-an.
Gani sa Isugid kay Mayor ginmando ni Mayor Albee Benitez sa katapo sang Bids and Awards Committee nga masuguran na ang bidding process para sa ginaduso nga P8M drainage project sang City Engineer’s Office nga maga-angut sang drainage halin sa Gatuslao Street palapos sa dalan San Juan pakadto sa baybay.
Ang kakulang sang outfall ukon guluwaan sang tubig baha ang kabangdanan kun ngaa indi masolbar ang malawig na nga problema sa baha sa lugar.
Ang drainage project nga sarang maglawig sa isa ka bulan nga construction amo ang ginatan-aw nga pat-od mga solusyon sa problema.