![](https://i0.wp.com/digicastnegros.com/wp-content/uploads/2024/02/image-268.png?resize=716%2C403&ssl=1)
BFP magapatigayon sang fire safety inspection sa 41 ka business establishment nga gin-recall ang business permit.
Magahinyo ang Bureau of Fire Protection – Bacolod sang listahan gikan sa Business Permits and Licensing Office sang 41 tanan ka mga negosyo nga natagaan sang business permit nga wala sang fire safety inspection certificate.
Ginpahayag ni Bacolod BFP Deputy City Fire Marshall SFO4 Jereck Barbas nga ginpalab-ot ang problema sa BPLO sang matalupangdan nga isa sa mga applikante nga nagakuha sang certification ang may yara na sang business permit bisan wala maka-agi sa ila talatapan.
Ang fire safety inspection kabahin sa mga requirement para sa business permit. Gani ginpa recall na sang siudad ang mga na-release na permit sa 41 ka mga commercial establishment.
Ang BFP ang natalana man magapatigayon sang fire safety inspection agud mausisa kun may violation ukon wala ang mga aplikante bahin sa Republic Act 9514 ukon ang Fire Code of the Philippines.
Samtang ginpahayag man ni City Legal Officer Atty.Romeo Carlos Ting,Jr. nga bukas siya sa mangin paathag sang Management Information Technology and Computer Services Office angut sa gin-alegar glitch ukon nagluntad nga diperensya sa ginpatuman nga online system rason nga na-imprinta kag na release sang BPLO ang mga permits.