Mga biktima sang pagbaha sa Bacolod City ang isa-isa nga gin-rescue kag ginpasakay sa inflatable boat, samtang ang iban gintuwangan kag gin-aba sang katapo sang Bureau of Fire Protection, fire volunteers, Philippine Coast Guard kag katapo sang Philippine Red Cross.
Wala labot sa mga tigulang, may balatian, kabataan kag pila ka mga indibidwal nga na-stranded bangud sang baha, gintinguhaan man sang mga rescuers nga masalbar ang mga hinuptanan nga ido.
Sa NHA Village sa Barangay Pahanocoy, may 69 ka mga indibidwal ang ginpangbakwit sang BFP, samtang 40 naman sa Purok Fatima Dos, Brgy. Sum-ag.
May pila ka mga residente ang ginpang-evacuate sa Brgy. 39, Purok Progreso sa Taculing, Purok Carvic sa Mandalagan kag Barangay Banago.
Naghatag sang bulig ang mga responders sang Philippine Red Cross Negros Occidental-Bacolod City Chapter Emergency Response Unit sa ginpatigayon nga rescue operation sa Purok Mars, Barangay Singcang-Airport.*