Shadow

Benitez: Kun may ebidensya nga makita ang Truth Commission may magapangatubang sang kaso

Ginmanduan ni Bacolod City mayor elect Albee Benitez ang iya gin porma nga Truth Commission nga mangin ma-id-id sa ila nga pagahimuon nga imbestigasyon sa tanan nga transaksyon sang present administration.

Luyag ni Benitez nga matinlo-an ang tanan antes siya magpungko sa pwesto. Kag luyag niya man nga maklaruhan ang pumuluyo sang Bacolod sa sitwasyon sang siudad kag bentaha man ini para sa Leonardia administration kun mapamatud-an nga wala sila sang sala nga ginhimo para man maklaruhan ang ila nga ngalan.

Sa bahin sang job orders sang siudad miteryoso pa suno sa kay Benitez kun pila gid bala ang mga job order sang siudad. Pero sa iya natukiban nga sa Mayor’s Office pa lang may 356 million pesos na nga appropriation para sa job orders.

Plano niya nga isa sa una niya nga mga executive orders nga pirmahan ang pagbalik sang tanan nga mga empleyado sa ila nga mga mother units. Pinaagi sini mahibaluan niya man kun pila gid bala ka mga job orders ang gina kinahanglan sang siudad.

Nag umpisa na siya sa pag sugilanon sa nagkalain lain nga mga departments kag suno kay Benitez very cooperative ang mga nasugilanon niya.

Ang City Engineers Office gani kuno maga sumite sang bag-o nga design para sa trade center sang Bacolod. Imbes abi nga coliseum luyag ni Benitez nga himuon na lang ini nga trade center para indi maubos ang P800 million pesos para lang sa isa ka proyekto.

Luyag niya nga i repurpose ukon isaylo naman sa iban nga proyekto ang iban nga kwarta kag napilian niya amo ang pagkaayo sang tatlo ka dalagko nga merkado sa Bacolod.

Gina kay-o na ini subong suno sa iya pero facelift lang ang matabo. Nakig sugilanon na siya sa DBP nga bangko kun sa diin nag loan sang kwarta ang siudad kag kulang na lang gid approval sang contractor nga natalana naman makigkita sa iya sa Huwebes.

Samtang may napili-an na siya nga City Administrator kag City Legal Officer kag mahimo sa sini nga semana ipakilala niya na sila.

Sa iya pag atubang sa media sa iya thanksgiving dinner iya gin hangkat ang media nga padayunon ang paghaboy sang mga palamangkutanon sa iya nga administrasyon.

Ginahaylo niya ang media nga ipahibaluon siya kun may mahibaluan ang media nga indi amo sa iya adminstrasyon para matapna gilayon.

Secured By miniOrange