30 percent nga reduction sa MOOE sa 2023 budget sa mga departamento sang Gobyern Probinsyal ang gina paabot ipatuman. Pero, benepisyo sang mga empleyado ang indi maapektuhan sa tunga sang ipatuman nga budget cut.
Wala pa sa karon maka submit sa Sangguniang Panlalawigan sang 2023 budget proposal.
Suno kay Provincial Administrator Rayfrando Diaz yara na sa kay Governor Eugenio Jose Lacson ang magpatpat sang kun ano ang mangin prayoridad sa 2023 budget.
Pero, kay tungod sang masobra sa 700 million pesos nga buhin tuga man sang pagnubo sang National Tax Allotment, 30 percent across the board nga buhin sa Maintenance and Other Operating Expenses sa tagsa ka departamento ang ipatuman. Ang mga labing importante lamang ang pwede nga mahatagan sang budget kag ipaaiway ang pwede anay mapaiway.
“Ang pinaka daku gid ya nga adjustment ang pag reduce sang MOOE”, suno kay Diaz.
Ang mga flagship projects nga gin pahayag sang gobernador sa Inaugural Speech sini ang gina tinguhaan nga mahatagan sang pondo suno kay Diaz nga nagalakip sang food security, environment, watershed kag ang PPP sa bulk water para sa potable water sa LGUs.
Pero suno kay Diaz ang mga benepisyo sang mga empleyado ang indi ma apektuhan. Sang Hulyo napatuman ang third tranche sa Salary Standardization Law kag ang fourth tranche ipatuman sa masunod nga tuig kag ini ang napainan sang pondo. Padayon ang pagbulig kag benepisyo sa mga empleyado nga apektado man sang sitwasyon sang ekonomiya karon.
“We will also help our employees, absorb the economic difficulties that we are facing by giving them what is due to them under the law and above the law may ara pa gid kita gina hatag nga benefits such as libreng sakay”, suno kay Diaz.
Naga pasalamat naman ang Progressive Alliance of Capitol Employees sa gobernador sa pagpasiguro sang pagpatuman sang fourth tranche sa salary increase sa 2023.
Ginahaylo naman sang PACE suno sa presidente sini nga si Renelo Lastierre ang mga empleyado nga maghatag sang nagakaigo nga public service.
Nagapabilin nga importante ang mga job order worker, casuals kag yadtong sa idalom sang contract of service kag wala sang pagbuhin nga matabo suno kay Diaz. Sa karon padayon gani ang hiring kag nagalakip ini sang 190 ka mga mangunguma angut sa rice sufficiency program sang probinsya.
Full swing ang operation sang Negros Residences kag Negros Food Market Terminal nga upod sa iban pa gid nga Economic Enterprise sang probinsya gina lauman nga makabulig sa local income.