Nagpaandam si Philippine National Police Chief General Nicolas Torre III sa mga pulis nga overweight kag madako ang tyan nga sila ang posible makakas sa pwesto kun sila ang indi magniwang sa sulod sang isa ka tuig.
Gani, nagsugod liwat ang Bacolod City Police Office sang ila Regular Physical Conditioning Program nga ginatawag Pulisteniks.
Nagatuyo ang inisyatibo sa pagpasanyog sang ikaayong lawas sang kapulisan agud mapasiguro nga fit, alerto kag handa sila sa paghimo sang ila obra.
Isa sa pinakauna nga mando sang PNP chief amo nga dapat pasado ang mga kapulisan sa ila annual Physical Fitness Test, kag kun sila ang mapaslawan sang makaduha ka beses, maga-apekto ini sa ila promotion.
Ginsiling ni PNP spokesperson Police Colonel Jean Fajardo, ang isa ka pulis ang indi dapat magbug-at sang masobra lima ka kilo sa ideal weight. Exempted sa nasambit nga standards ang mga pulis nga may seryoso nga medical conditions ukon disabilities.