Pamuno sang Bacolod City Police ginapausisa ang na-issue nga driver’s license sa na-aresto nga lider sang sindikato kag katapo sang terrorist group. Kabahin sa mga na recover sa nadakpan nga Indian National nga si Joginder Geong alyas KANT GUPTA ang driver’s license nga nagapakita nga isa siya ka Filipino citizen nga naga istar sa Barangay Taculing.
Butang nga ginadudahan ni BCPO Director Col. Noel Aliño rason nga nagpadala siya sang sulat sa talatapan sang LTO- Bacolod agud ma usisa kun ngaa may nauyatan nga driver’s license ang 40 anyos.
Tuyo ni Aliño nga mapat-ud kun peke ang driver’s license kag kun paano kag diin niya ini nakuha.
Si Geong ang wanted sang Indian Embassy bangud sang kaso nga murder, attempted murder kag robbery.
Siya ang ginatudlo leader sang organized crime syndicate kag napamatbatan na sang life imprisonment.
Suno sa PNP, gin aresto ang indian national bangud sang pag bayolar sang Philippine Immigration law bilang isa ka undesirable alien ukon pugante sa India.
Madugay na siya nga naga panago sa Pilipinas gamit ang peke nga ngalan kag Nepalese passport.
Sa ginpa gwa nga memorandum sang Bureau of Immigration si Geong ang may kaangtanan man sa Khalistani Terrorist Group.