BCPO ginklaro nga ang na-detain nga Indian national amo ang driver sang Innova nga nang-arado sa mga naga-prusisyon sa Barangay Alangilan sa Bacolod.
Taliw-as sa mga alegasyon, ginklaro ni Bacolod City Police Office Director Police Colonel Joeresty Coronica nga duha ka testigo ang nagpamatuod nga si Jagpreet Singh ang driver sang Toyota Innova nga nag-arado sang mga nag-prusisyon nga ginkamatay sang tatlo ka mga persona kag pagkasamad sang 16 ka iban pa sang tinalikdan nga Biyernes Santo sa Barangay Alangilan.
Gindugang ni Coronica nga nagpositibo sa alcohol test ang 37 anyos nga driver bisan pa nagpanginwala ini nga naka-inom sang matabo ang insidente. Ginakabig sang pamunuan sang BCPO nga isa ka “air tight” case ang napasaka nga kaso nga reckless imprudence resulting in multiple homicide, multiple physical injuries and damage to property batuk kay Singh.
Ginpasakaan man siya sang separado nga kaso angut sa driving under the influence of liquor.
Ginpahayag ni Mayor Albee Benitez nga paagi sa DSSD, sarang maghatag sang medical assistance ang siudad sa 16 ka mga pasyente, duha sa ila ang naka-gwa sa ospital.
Ang City Health Office magapatigayon man sang psychological therapy sa mga nabiktima sang aksidente.