Iga-demolish sang Bacolod City Government ang BAYS Center kag pila pa ka mga opisina nga kaiiping sini nga sakop sang Manokan Country Redevelopment Project.
Ginpaathag ni Atty. Vanessa Encabo, spokesperson sang City Legal Office, sa isa ka media interview, nga paagi sa City Engineer’s Office ginsugdan na ang demolisyon kaangay sang likod nga bahin sang BAYS center.
Nadala sa listahan sang iga-demolish amo ang opisina sang CIDG, impounding area sang City Legal Office, Nutrition Center, Tourism Office kag ang pwesto sang mga nagabaligya sang bulak.
Suno kay Encabo, gin-una na karon ang pagbungkag sang impounding area sang City Legal Office nga nag-umpisa pa sang nagligad nga semana.
Target sang LGU nga matapos ang tanan nga demolisyon antes sa Marso 31, 2026, agud dayon ini ma-turn over sa SM Prime Holdings, Inc. bilang kabahin sang redevelopment project.
Samtang, ginpahayag man niya nga magapatigayon liwat sang ocular inspection kag survey ang City Engineer’s Office sini nga semana sa area.
Tuyo sini nga mahibaluan kun bala may bahin sang Police Station 1 nga maapektuhan sang demolisyon, pati na kun madala man ang opisina sang COMELEC Bacolod sa proyekto.*
[sibwp_form id=1]