Nagpadala sang licensed geologist ang Provincial Environment and Natural Resources office sa NOHS para mausisa ang bato nga nahulog sa sulod sang compound sang eskwelahan sang Hunyo kwatro.
Isa ka dako nga palamangkutanon kun makabig nga meteorite ang bato bangud suno sa una nga naka sapo diri, nga misis sang security sang eskwelahan nakibot na lang siya sang hinali nga may nag lupok kag nakita niya nga naga daba daba ang amo mga bato.
Gani para maathagan kun ano gid ang bato nga nahulog sa compound sang eskwelahan nakig angut si NOHS principal Mario Amaca sa nagkalain lain nga mga ahensya sang gobyerno. May nasugilanon siya nga taga National Museum nga nag lantaw sa hitsura sang bato pinaagi sa video. Iya gin hambalan si amaca nga sa hitsura, may posibilidad nga isa meteorite ang bato.
Para mas maathagan nagpadulong sa eskwelahan kaina sang aga ang geologist sang PENRO kag focal person sang Mines and Geosciences Bureau nga si Arnel Angelo Oralde.
Sa inisyal niya nga pag lantaw sa bato indi amo sina kadako sang iron content sini bangud wala naga tapik maayo sa magnet pero may nakita siya nga olivine content ang bato nga isa man sa mga mineral nga content sang meteorite.
Para masiguro kun meteorite gid man ang bato kinahanglan ini nga madala sa laboratory sang UP ukon National Museum. Subong pa lang may mga naga pabutyag na sang interes sa school principal nga baklon ang bato
Para sa iya, meteorite man ukon indi isa ka dako nga bulig para madugangan ang kaalam indi lang sang mga estudyante sang NOHS kundi pati sang mga Negrense ang pagtuhaw sang amo nga bato.
Mag hulat ang eskwelahan sang instructions sang National Museum kun bala ipadala didto ang bato ukon ila nga kuhaon sa Bacolod.