Ginkumpirmar ni Bacolod City Fire Marshall FSupt. Jenny Mae Masip nga ang paghampang sang isa ka pito ka tuig nga bata nga lalaki sang lighter kag kandila sa sulod sang ila balay ang ginhalinan sang kalayo.
Base sa ila nga imbestigasyon, wala sang upod nga ginikanan ang amo nga bata sang natabo ang insidente.
Ginklaro ni Masip, nga indi man masiling nga may negligence ang ginikanan bangud aksidente ang natabo. Indi man mapasabat ang bata nga karon nagapabilin sa hinakop sang iya ginikanan.
Nagdangat sa 29 ka mga balay ang gintupok sang kalayo. Beinte diri ang totally destroyed samtang siyam naman ang partially damaged.
Sa record sang Department of Social Welfare and Development may 32 ka mga pamilya ukon 109 ka indibidwal ang nadulaan sang balay.
Suno sa pamuno sang DSSD nga si Dr. Richelle Verdeprado-Mangga, tanan nga mga apektado ang temporaryo nga naga-istar sa ila mga himata nga yara man sa Barangay 2.
Nagapanawagan sa karon ang BFP nga likawan nga ibilin sa balay ang mga kabataan kag ipalayo ang mga flammable nga mga butang sa ila.
“Tungod sa natabo nga insidente sa Barangay 2, ang mga kabataan naton indi tagid pagbayaan nga mahatagan sila sang tyansa nga maghampang sang kalayo. Himuson ta ang lighter, posporo, kandila, even ang butane ukon anything nga pwedi tuna-an sang kalayo. Ibilin tagid dapat ang aton kabataan sa responsible adult nga mabantayan sila and kon ano ang makita nga pwedi tuna-an sang sunog, insigida matapna naton,” suno kay Masip.*
[sibwp_form id=1]