Alkalde sang San Enrique ang nag mando na sang paghakot balik sang basura sang banwa nga damlag gin-ula sa isa ka pribado nga duta sa banwa sang Pulupandan.
Sa Cease and Desist Order nga gin pananaog ni Pulupandan Mayor Miguel Peña sa tag-iya sang duta nga si Novo Torres, ginmando ang pagsira kag pag untat sang pag operate sang open dumpsite sa propiedad sini sa Brgy Palaka Sur sa Pulupandan.
Ini ang isa ka pagsupak sa RA 9003 ukon ang Solid Waste Management Act.
Ang CDO ang gin papanaog sadtong Setyembre 2. Nagtanyag man sang assistance si Peña sa San Enrique sa pagpabalik sang basura sini via return to sender.
Suno kay San Enrique Mayor Jilson Tubillara nakasugilanon na sila ni Mayor Pena kag iya na nga gin mando ang pag hakot balik sang basura.
Paathag ni Tubillara, mismo ang tag-iya sang duta ang nag-ayo nga i-fill-up ang amo nga duta. Iya man ginsiling nga kis-a man lamang naga tambak sang basura ang San Enrique sa amo nga duta. Ginhimutig niya man nga isa ka open dumpsite ini, kundi isa ka controlled dumpsite nga naga kasayuran nga kada haboy sang basura, gina tampukan man ini.
“Ga-operate naman gani ang amon segregation. May order na ko sa akon ENRO. Gin-orderan ko na sila to do it immediately as soon as”, suno kay Tubillara.
Sa impormasyon sang OIC sang Pulupandan Municipal Environment Natural Resources Office nga si Mila Lourdes Tandoy, makaduha ukon makatlo ka beses nga naga ula sang basura sa kada semana sa amo nga propiedad kag samo-samo ang basura nga ginahaboy diri lakip na ang medical waste, bagay nga ginhimutig ni Tubillara.
Dugang pa ni Tandoy, December 2021 pa nagsugod ang pag haboy sang basura sa amo nga duog.