Kabahin ang kapin 20 ka mga barkers sa mga ginpangsikop sa ginpatigayon nga inspection kag clearing operation nga ginpangunahan sang Public Order and Safety Office sa Bacolod Public Plaza kahapon.
Ginpaandaman sila ni POSO head, retired Police General Primitivo Tabujara nga indi na sila tugutan nga magpasaka pasahero kag pati na magpaisol sang mga salakyan tungod sang reklamo sang mga drivers nga gina-alegar ila ginabuyayaw kag gina-sing-alan kun indi sila matagaan kag kun manubo ang suhol nga ila nabaton.
Ginsiling ni Tabujara nga dapat ma-regulate ang kadamuon sang barkers ilabi na sa downtown area agud nga mapaiway ang mga reklamo kag masiguro nga hilway ang mga car owners sa pag-park sang ila mga salakyan sa mga gintalana nga parking areas. Kabahin man sa gina-monitor sang POSO ang mga car wash boy nga gina-alegar nagapanag-ub sang tubig halin sa plaza.