Nakaangkon sang igo sang bala sa hawak kag pa-a ang 39-anyos nga barker matapos gintiro sang iya man lang kasubong nga barker sa dalan Lizares, Barangay 40 sa Bacolod City, kaina sang kaagahon.
Ang suspek nga ginkilala kay alyas “Roger”, ang nakapalagyo kag padayon nga ginapangita sang kapulisan.
Gindala ang biktima nga si alyas “Rolando” sa ospital kag sa latest nga update sang PNP, siya ang igapaidalum sa surgery.
Suno kay Police Captain Peter John Ramos, hepe sang Station 6, nag-ugat ang insidente sa agaway sang biktima kag suspek sa pasakaay sang mga pasahero sa jeep sa Libertad.
May nagluntad nga komosyon kag gintiro sang suspek ang biktima, gamit ang wala pa mahibaluan nga kalibre sang armas.
Gina-preparar karon sang Station 6 ang mga dokumento sa pagpasaka sang kaso nga frustrated homicide batok sa suspek.*