Mga punong barangay, health care workers ginpaidalom sa orientation para mapabaskog ang kampanya batuk sa monkeypox kag Covid 19.
21-day isolation period ang igapatuman para sa mga posible malatnan sang monkeypox, Indi kasubong sa Covid-19 patient nga napaidalom na lang 10 day isolation sandig sa pagsulundan sang Department of Health.
Sa orientation sang City Health Office upod sa mga punong barangay kag tiglawas sang barangay health unit ginpatpat man ang mga tikang sa pagpatuman sang testing, monitoring kag contact tracing agud mapabaskog ang kampanya batuk sa monkeypox kasubong sang ginapatuman nga health protocol sa bahin sa kampanya kontra Covid 19.
Sa baylo nga gamiton ang Midway Facility, ginsiling man ni Dr. Grace Tan, pamuno sang City Epidemiological Surveillance Unit nga karon ginahanda na sang siudad ang natukod nga isolation facility sa Evacuation Center sa Barangay Vista Alegre para sa posible malatnan sang monkeypox.
Sa pagsugod man sang BER months liwat nga ginahaylo sang pamunuan sang CHO ang mga kabarangayan sa strikto nga pagtuman sang minimum health protocol ilabi ang pagsuksok sang facemask kag social distancing agud mapunggan ang paglaton sang Covid 19 kag monkeypox.