Ginbawian sang kabuhi ang isa ka 8 anyos nga bata nga babaye nga taga Barangay Handumanan sa Bacolod City bangud sa Dengue.
Siya ang pinakauna nga na rekord nga death case sa Barangay Handumanan nga sa karun ika duha nga Barangay sa may pinakadamo nga kaso sang dengue sa siudad.
Ginsiling ni Dr. Grace Tan, pamuno sang Environmental Sanitation Division nga sang Setyembre 28, nakabatyag na sang hilanat, sakit sang tiyan, kag pagsuka ang biktima. Nadala pa ini sa ospital apang ginbawian sang kabuhi sang Oktubre 3.
Sa medical record sang bata, nakaagi naman ini dengue sang lima palang siya ka tuig.
Sa karun, ini na ang ika anum nga kaso sang pagkapatay bangud sa dengue sa sini nga tuig. Nagsaka man sang 1.5 percent ang kaso sang dengue sa Bacolod kun ikumpara sang nagligad nga tuig.
Sa 891 ka mga kaso, nagapabilin nga pinakamadamo nga kaso ang Barangay Mansilingan nga may 2 deaths kag 105 cases.
Liwat man nga nagpanugyan si Tan sa publiko nga likawan ang pag stock sang tubig, ilabi na kun naga-inulan.
Dugang pa niya, malikawan ang dengue kun ipabilin nga matinlo ang palibot.
“To be sure, dapat madula gid ang breeding places na sa sulod kag sa gwa sang balay ta. And remember, ang peak biting hours sang lamok, meaning ang tyempo nga medyo active siya kag mangagat siya is between 1 to 2 hours before sunrise and 1 to 2 hours before sunset. Meaning amo gid na sa time nga damo sila kag mangagat gid sila”, suno kay Tan.
[sibwp_form id=1]