Naglab-ot man sa masobra isa ka libo nga mga residente sang Barangay 39 sa Bacolod City ang nahalitan sang baha tuga sang pag ulan nga dala sang habagat nga gin pabaskog ni Bagyo Egay sang Martes.
Gani nagdesisyon si Punong Barangay Jude Salusada nga magdeklarar sang state of calamity agud mabuligan ang mga apektado nga pamilya pinaagi man sa pag gamit sang pondo halin sa calamity fund sang barangay.
Pila sa mga masobra 340 ka mga pamilya nga gin evacuate ang nakabalik na sa ila puluy-an.
Magluwas sa Barangay 39 ginatun-an man ni Barangay Singcang-Airport Punong Barangay Rosinie Distrito nga ipaidalom sa state of calamity ang barangay nga isa sa labi nga naapektuhan sang pagbaha sa siudad.
May 104 man ka mga pamilya ang gin evacuate kag karon nakabalik na sa ila balay sang magtahaw ang baha sa amo nga barangay.
Sa record sang Bacolod DRRMO may 100 pa nga mga pamilya nga gin evacuate sa anum ka mga barangay ang nagapabilin pa sa mga evacuation centers.