Patay ang 32 anyos nga Overseas Filipino Worker matapos ginbuno sang iya live- in partner gamit ang screw driver sa Hda. Paz Barangay Canlandog, banwa sang Murcia Miyerkules sang aga.
Suspek sa pagpatay kay Ma. Adeline Dela Cruz, si Gerald Peñafiel, 39 anyos , nagatrabaho bilang isa ka sentensyador sa bulangan.
Suno sa hepe sang Murcia PNP nga si Police Major Sherwin Fernandez, natabo ang insidente sa sulod mismo sang balay sang magkahagugma.
Sa ila imbestigasyon, sang Martes, nag-inaway ang duha kag nag-maoy si Peñafiel. Base sa impormasyon nga nabaton sang PNP, masami nga naga-away ang duha bangud nagapangimon si Peñafiel.
Nagpauli Miyerkules ang biktima sa ila balay para magkuha sang iya mga pagkabutang pero ginbuno siya sang iya live-in partner gamit ang screw driver.
Nadakpan ang suspek pagkahapon samtang nagpanago sa sulod sang katubuhan kag na-recover ang screw driver nga gin-gamit sa pagpangbuno.
Si Peñafiel ang detained sa karon sa Murcia PNP kag posible nga pasakaan sang kaso nga murder.