Nasapwan sang isa ka mangingisda ang bangkay sang tigulang nga babaye samtang naga-utaw-utaw sa baybay sang Barangay Lo-ok, banwa sang Calatrava, Negros Occidental, Martes sang aga.
Ginpahibalo sang mangingisda ang Bantay Dagat sang banwa nga amo ang nag-retrieve sang bangkay kag nagdala sa higad sang baybay.
Ginsiling ni Police Capt. Jesus Alba, hepe sang Calatrava PNP, positibo nga ginkilala sang iya himata ang biktima nga amo si Feliciana Bahibag, 60-anyos, residente sang Barangay Cambayono sa Calatrava.
Suno sa hinablos sang biktima, naanod sang tubig si Bahibag sa pil-as sa ila lugar, matapos magbubo ang mabaskog nga ulan sadtong Lunes sang gab-i.
Ginpakamaayo sang pamilya nga ilubong na lamang ang bangkay sang biktima bangud nagakaagnas na ini.