Yara na sa advanced state of decomposition ang bangkay sang isa ka manug-bantay sang punong sang siya ang nakit-an nga naga-utaw-utaw sa pangpang sang suba sa Sitio Wayang, Barangay III sa Himamaylan City.
Isa ka mangingisda nga magapalawod na kuntani ang nakadepara sang nagakulob nga bangkay sang 43-anyos nga biktima.
Suno sa kapulisan, wala sang foul play sa kamatayon sang biktima.
Base sa imbestigasyon, nag-inom-inom ang biktima upod ang iya mga abyan sadtong Huwebes sang gab-i, kag nagpahayag ang biktima nga languyon niya ang suba pakadto sa iya gina-istaran nga payag, sa pihak lang sang iya ginabantayan nga punong.
Ginpunggan siya sang iya mga kaupdanan kag ginhambalan nga indi na maglangoy bangud tungang gab-i na apang nagpadayon sa paglangoy ang biktima.
Bangud wala maka-duty pagka-aga ang biktima, siya ang ginpangita sang iya mga kaupdanan apang sila ang napaslawan.
Sabado na sang aga sang makit-an ang lawas sang biktima.