Isa ka bangkay sang lalaki ang nakit-an nga naga-utaw-utaw sa suba sang Hacienda Soledad, Purok Alpine, sa Barangay San Vicente, banwa sang Binalbagan, Domingo sang aga.
May putos nga sako ang ulo tubtob sa abaga sang bangkay, nga nagakaagnas na.
Nadiskubrehan sang concerned citizen nga nagapangahoy sa higad sang suba ang bangkay.
Suno kay Capt. Joelan Vinson, hepe sang Binalbagan Police Station, ginabulubanta 35 tubtob 40 anyos ang biktima, may kataason nga 5’3” tubtob 5’5”, kag nakasuksok sang itom nga t-shirt nga may Jag Thug nga print, kag itom nga delargo.
Madamo sang tribal nga tattoo ang lalaki, nakasuksok sang relo nga may brand nga Elmer Ingo kag silver class ring nga may naka-engrave nga “BS MAR-R, 2017” kag “Maritime Education”.
Suno kay Vinson, wala sang reported nga nadula sa area sang Binalbagan kag mga kaiping nga lugar, apang sila ang naga-coordinate pa sa iban nga mga istasyon kun may yara sila sang reported nga missing person.
Base sa examination sang doktor, wala sang visible nga mga pilas ang biktima, nga ginabulubanta tatlo na ka adlaw nga patay antes siya ang makit-an.
Gindala sa Soledad Funeral Homes ang bangkay, nga nagapabilin nga wala pa makilala as of press time.
“I-try gid namon subong kay nagareklamo man mismo ang Soledad nga medyo baho na gid ang cadaver so i-try gid namon.. nag-coordinate kami sa local government unit para mabuligan nga mapalubong na lang kag in case gid man nga may maka-identify thru sa mga pictures ta nga ginpang-post ta man sa tagsa-tagsa sa pag-coordinate ta sa mga stations. Dira lang naton ma-recover ang cadaver gid man sang lawas kung may ara gid man mag-claim”, suno kay Vinson.
