Nasapwan ang isa ka bangkay sang lalaki sa hilamunan nga bahin malapit sa barangay road sang Purok Yap, Barangay Alangilan sa syudad sang Bacolod, kaina, Lunes sang aga.
Nakit-an ang biktima nga may busal ang baba, nakagapos ang duha ka tiil kag kamot gamit ang duct tape, kag may karton sa ibabaw nga may nakasulat nga mga tinaga nga “Winston Bawang kag pusher”.
Suno kay Police Major Marc Joeil Reclamado, hepe sang Bacolod Police Station 5, ginkilala sang mga himata sa punerarya ang bangkay nga amo si Christian Bawang, residente sang Barangay Estefania sa Bacolod.
Ang lugar kon sa diin nasapwan ang biktima, boundary na sang Bacolod kag banwa sang Murcia. Wala man diri sang signal kag wala sang street lights, suno kay Reclamado.
Posible nga sa iban nga lugar ginpatay ang biktima kag didto lang sa Alangilan ginbilin ang iya bangkay.
Ginsiling ni Reclamado nga nakarekober sang SOCO ang lima ka magagmay nga sachets sang ginasuspetsuhan shabu sa natuo nga bulsa sang biktima.
Nagapakig-angut pa ang kapulisan sa pamilya sang biktima agud mahibaluan ang motibo sa pagpatay kay Christian, apang, isa sa mga anggulo nga ila ginalantaw nga ini may angut sa iligal nga droga.
“Ang gina-check namon is it’s either drug-related because of the signage na nakabutang nga pusher kag ang recovery sa iya nga right pocket.. Bale may narecover nga lima ka small sachets sang suspected shabu”, suno kay Reclamado.