Detained karon sa Hinigaran Police Station ang duha ka mga suspek nga ginatudlo responsable sa kamatayon sang 29-anyos nga lalaki nga nasapwan nga may buno sa lawas sa Crossing Bolobito-on, Barangay Miranda sa banwa sang Hinigaran sadtong Biyernes nga adlaw.
Nakit-an na lamang ang biktima nga ginkilala kay Christian Oliva, naga-obra sa kampo kag residente sang Barangay Camba-og sa amo man nga banwa nga nagahigda sa dalan, wala na sang kabuhi kag may buno sa iya nga tiyan.
Gindala si Oliva sa Hinigaran Medical Clinic kun diin siya ang gindeklarar nga dead on arrival.
Sa imbestigasyon sang PNP, nagbakal sang sigarilyo ang biktima kag ang iya paryente kun diin naga-inum-inom ang mga suspek. Nagluntad ang pagbinaisay kag nabuno sang mga suspek ang biktima.
Ginsiling ni Police Lt. Col. Eduardo Corpuz, hepe sang Hinigaran Police Station, lima ang ila inisyal nga “persons of interest” apang sa padayon nga imbestigasyon, nag gwa nga ang duha gid lamang ang nangamot kag ang tatlo ang nagbulig lang tambag.
Suno kay Corpuz, sa bulig sang barangay kagawad, napa-surrender ang duha ka mga suspek nga posible magapangatubang sang kaso nga murder.