Isa ka bana nagpa tughong lang sang iya nga motor pagbalik niya wala na ang iya nga misis kag sa pagpangita niya, bangkay na ang iya nga nasapwan.
Rape kag robbery ang pila lang sa mga anggulo nga ginalantaw sang kapulisan sa kamatayon sang isa ka iloy nga ang bangkay nasapwan sa bakante nga lote sa Sitio Capayas, Barangay Sicaba sa Cadiz City, hapon sang Huwebes, Mayo21.
Ang biktima nga si alyas “Jen”, 38-anyos ang nasapwan sang iya bana nga wala na sang kabuhi, may mga pilas sa ulo, duguon ang itsura, may mga lagob kag wala na sang pang-idalom nga panapton.
Nag-gwa sa imbestigasyon sang Cadiz PNP nga mga las 12 sang udto, magakuha kuntani sang kwarta sa lending ang biktima upod ang iya bana, apang nagpa-gas ang iya bana kag naghulat ang biktima sa waiting shed, nga ginabulubanta 300 metros ang kalayuon sa ila balay.
Pagbalik sang bana, wala na ang iya asawa. Nag-haum-haom ang bana nga nag-una ang iya asawa sa Lending Company, apang wala niya ini makita didto rason nga ginlibot niya ang palibot sang waiting shed upod ang iya bata.
Didto na kag nakita sang bana ang bangkay sang iya asawa mga 15 tubtob 20 metros ang kalayuon sa waiting shed.
Ginsiling ni Police Lt. Daleen Grace Loreno, deputy chief sang Cadiz PNP nga nakita sa imbestigasyon nga ginkuga ang biktima gamit ang sling sang iya nga bag. Magluwas sini, may lagub sa mata ang biktima, nga tuga sang paglampos sang bukol sang lubi, nga na-recover man sa crime scene.
Isa ka person of interest ang gina-monitor karon sang kapulisan kag padayon pa ang pagpangita sang mga saksi.
Ang lugar sang insidente, lapit sa barrio road, apang malaka lang ang mga nagalinabay nga mga salakyan.
May duha ka mga kabataan ang biktima kag iya bana. Pagpanguha sang kasag ang ila palangabuhian.
“Wala ta man ginadula tanan nga possibilities nga basi na-sexually abuse siya. So that’s why nga gin-check man to sang medico legal naton. Subong gina-post mortem examination siya. Gin-subject siya sa autopsy. Initially ginkuhaan man to siya sang swab sa iya genital area to check if may ara presence sang spermatozoa or may ara sang mga forced laceration. If may ara nag-positive, so ang case is rape with homicide.. Ginalantaw man ang possibility nga robbery with homicide kay because makuha siya sang money sa lending basi nag-presume siya nga nakuha na”, suno kay Loreno.*
[sibwp_form id=1]