Tatlo ka adlaw matapos nagtabok sa suba kag naanod ang construction worker, nasapwan sang manugpamunit isda ang iya bangkay nga nagaka-agnas na sa Purok Argentina, Barangay Ma-ao sa Bago City, Martes sang hapon.
Napatung-an sang duha ka dalagko nga bato sa tunga sang suba ang lawas ni alyas “Bhoy”, 51-anyos, residente sang Purok Kaag-huan, Brgy. Ma-ao.
Sa panaysayon sang utod sang biktima, Sabado, sang sila ang nag-inom-inom, kag pagkagab-i, naglisensya ang biktima nga makadto sa balay sang ila iloy.
Ginpunggan sang utod si alyas “Bhoy” bangud hubog na ini. Magluwas sini, kinahanglan niya nga magtabok sa madalum nga bahin sang suba kag sadto nga tion, mabaskog pa ang daludo sang tubig bangud sang ulan.
Apang nag-insister si alyas “Bhoy” kag naglakat. Sa imbestigasyon sang PNP, posible nga siya ang gin-anod sang daludo sang tubig kag nalumos.*