Nag abot na Martes sang aga sa ila nga balay sa Brgy. Buanoy, Balamban, Cebu ang bangkay sang isa sa mga gina alegar katapo snag New People’s Army nga napatay sa encounter sa Kabankalan City sang Domingo nga si Jhonn “Dee” Supelanas alias Dahlia.
Si Alias Dahlia ang gina siling sang Philippine Army nga political instructor sang nabilin nga pwersa sang South West Front sang NPA. Alumna siya sang University of the Philippines Cebu.
Base sa impormasyon gikan sa Tug-ani, ang Official Student Publication sang UP-Cebu, si Supelanas ang nagkuha sang kurso nga Bachelor of Arts in Communication. Isa siya ka transwoman activist, student leader nga naga pakigbato sang libre nga edukasyon, basic social services, good governance kag democratic rights.
Nangin kabahin man siya sang fact-finding mission investigating team angut sa Oplan Sauron Massacre nga ginkamatay sang 14 ka mga mangunguma gikan sa Negros sang March 30, 2019.
Una na nga nakilala ang apat pa ka mga napatay sa encounter nga naga lakip sa kay Reniel Cellon ukon alias Ka Kumpol ang anay commander sang grupo sang NPA sa southern Negros.
Isa na lang sa pito ka napatay ang sa karon wala pa makuha sang pamilya.
Ang bangkay ni alias Pitong na lang karon ang naga pabilin nga wala makuha sang pamilya as of press time.
Domingo sang kaagahon sang natabo ang encounter sa Barangay Tapi sa Kabankalan matapos nga may nanugid sa army nga may presensya ang armado sa lugar.
Kahapon sa pagtililipon sang Army, PNP kag COMELEC sa Regional Joint Security Control Center meeting ila ginsiling nga wala sang epekto ang amo nga encounter sa sitwasyon sang piniliay sa amo nga lugar.
Nagapabilin ang Kabankalan City nga green ukon wala malakip sa areas of concern apesar sang natabo nga engkwentro.