Bangkay nga nasapwan sa baybayon sang Bago, nakilal-an na.
Positibo nga ginkilala sang iloy nga si Gloria Mendoza nga iya anak ang bangkay nga nasapwan sa baybayon sang Purok Trece Baybay, Barangay Taloc sa syudad sang Bago, Negros Occidental, Domingo sang aga.
Suno sa mga himata, 15 diyas na nga missing ang biktima nga si Peter John Delos Reyes, 25, anyos, residente sang Brgy. 39 sa Bacolod City.
Maga-areya kuntani ang duha ka mananagat sang ila pukot sa lawod, sang ila makit-an ang lawas sang lalaki nga naga-utaw-utaw, gani, ila ini gindala sa higad sang baybay sang Taloc.
Wala sang pang-idalum nga panapton ang lalaki. Nagasuksok lamang ini sang campaign t-shirt sang isa ka kandidato sa pagka-konsehal sa Bago.
Ginsiling ni Lt. Col. Ariel Pico, hepe sang Bago City Police Station, posible nga nalumos ang biktima bangud wala man sang pilas nga nakit-an sa lawas sini nga yara na sa advanced state of decomposition.