Coastal area sa Negros Oriental gina monitor sang Bureau of Fisheries and Aquatic Resources matapos mag positibo sa red tide ang Bais Bay.
Mas gin pabaskog sang BFAR ang ila monitoring sa coastal areas sang Negros Oriental ilabi na mga bays sa posible pagtuhaw sang red tide.
Ang BFAR ang naka pagwa na sang red tide warning sang weekend nga naga abiso sa publiko nga indi magkaon sang shellfish halin sa Bais Bay kasunod sang natukiban nga high level sang paralytic shellfish poison sa samples nga nakuha sang nagligad nga bulan.
Suno kay Florencia Mepaña, BFAR-Negros Oriental Chief, may team gikan sa regional office ang nagkuha man sang samples sang shellfish halin sa Tambobo Bay kag Siit Bay sa Siaton.
Subong nga adlaw isa ka team ang nagkadto sa Bais City para magkuha sang shellfish samples sa Bais bay.
Ang samples ang ipaidalom sa laboratory testing para mahibaluan kun may presensya kag kun ano ka lala ang toxins nga delikado sa tawo.
2015 ang ulihi nga pagtuhaw sang red tide sa Bais Bay kag sang 2017 naman sa Tambobo Bay.