Napanimahuan nga baho sang asupre gikan sa Bulkan Kanlaon ang bangud sang naglain na nga direksyon sang dapya sang hangin.
Sang Domingo na obserbahan na sang mga taga Canlaon City ang nag lain nga direksyon sang dapya sang hangin.
Sa video nga kuha ni konsehal Jigz Santiago sang Canlaon City, makita nga naga pakadto na sa Occidental side ang steam nga gina buga sang bulkan.
May ginreport nga na panimahuan ang asupre sa Bago kag La Carlota City, mga banwa sang Pontevedra, La Castellana kag Moises Padilla ini bangud suno sa kay Mari- Andylene Quintia, ang resident volcanologist sang PHIVOLCS sa La Carlota, ang pagkambyo sang dapya sang hangin ang isa sa mga rason kun ngaa napanimahuan ang asupre sa lima ka mga LGU.
Pero isa man sa ginalantaw nila nga bangud nagsugod na ang milling season basi ang baho sang molasses nasal-an man nga asupre.
Dugang pa niya nag ulan sang kahapon kag makusog ang hangin kag may mataas nga volume sa gihapon sang sulfur dioxide ang gina buga sang Bulkan Kanlaon.
Sa advisory sang PHIVOLCS subong nga adlaw, yara sa 8,973 ka tonelada sang asupre ang ginbuga sang Kanlaon sang kahapon. May napulo ka mga pagtay-og nga na-monitor sa bulkan.
Ini ang pila sa mga parameters nga balasehan sang posibilidad sang paglupok sang bulkan.
Gani naga pabilin sa gihapon sa alert level 2 ang Kanlaon, indi pwede masudlan ang 4 km permanent danger zone kag indi man pwede maka lupad ang ano man nga aircraft malapit sa crater sang Kanlaon.
“Ang dapya sang hangin pakadto southwest sang bulkan and also baskog ang hangin kahapon. Kag naka experience pa kita sang thunderstorms and rains. So pwede gid nga nakalab-ot gid sa medyo lagyo nga area ang aton nga sulfur dioxide”, suno kay Quintia.