Naga palapit na sa Batanes ang Bagyo nga Inday kag naga hinay na ang pwersa sini. Ang outer cloud bands ukon ining puti nga banda sa outer portion sang bagyo ang naga extend sa area sang Luzon nga amo ang naga dala sang ulan kag hangin. Sa idalom naman nga parte, ang clouds nga halin sa western section sang pungsod ini ang Southwest Monsoon ukon ang Hangin Habagat.
Ang Habagat ang ginpabaskog sang Bagyo nga Inday kag ginbutong pasulod sa western portion sang Pilipinas. Ini ang nagadala sang mabunok naman nga ulan sa mga yara sa western portion nga mga probinsya lakip na diri ang Isla sang Panay pati na ang Negros Island Region.
Ini ang rason kun ngaa maulanon ang panahon humalin pa kaina sang kaagahon. Naga untat kadali kag balik naman ulan tubtob sini nga hapon. Gani ang Isla sang Negros ginpaidalon sa yellow rainfall warning.
Ano meaning sang yellow rainfall warning? 50-100mm sang ulan ang ginapaabot, sa sini nga volume sang ulan ang mga lugar nga masami na nga gina baha ang may posibilidad nga magbaha na naman amo man ang mga nanubuan nga mga lugar kag ang mga higad sang suba.
Tubtob sa bwas, Sabado, ginapaabot nga magapadayon ang maulanon nga panahon sa Negros Occidental kag bisan pa ginapaabot na ang pagwa sang bagyo nga Inday sa PAR sa bwas, may posibilidad sa gihapon nga mangin maulanon ang panahon sa Negros dala sang Habagat.
Gani gina abisuhan ang tanan nga mag ulualigmat batuk sa baha kag landslide.
May masobra na sa 600 ka pamilya ang gin evacuate sa Isabela, La Castellana kag Moises Padilla tuga sang baha.
Bangud sang weather condition, suspendido anay ang biyahe sang roro kag barko pa Iloilo kag Dumangas halin sa Bacolod, Pulupandan pa Guimaras, San Carlos pa Toledo kag Cadiz pa Bantayan.
[sibwp_form id=1]