Gin pasa-pasahan sa Facebook ang litrato sang isa ka Toyota Avanza nga gina panag-iyahan sang siudad kag napaidalom sa MABB CAB nga gina park sa gwa sang puluy-an sang isa ka office head sang Bacolod.
Ang salakyan ang sadto anay may sticker sang siudad pero subong wala na. Gani ang nag post sang amo nga litrato ang nag kwestyon kun ngaa ginkakas ang sticker sang logo sang Bacolod sa salakyan kag kun ngaa naka garahe ini sa balay sang office head. Suno sa kay City Legal Officer Atty. Romeo Carlos Ting, Jr., dapat pagkatapos gamit sang salakyan gina balik ini garahe sa Bacolod City Government Center magluwas na lang kun may valid gid nga rason parehos na lang kun may sulugaton sa kaagahon. Pero magluwas sini wala dapat gina garahe ang salakyan. Suno pa kay Ting mahapos lang man ang pag trace kun sino ang naga gamit sang mga salakyan kay tanan nga lakat sini documented. Pinaagi sa MABB CAB nga app, ang isa ka empleyado ma book anay kun kinahanglan niya mag gamit sang salakyan sang siudad. Wala ini na assign sa isa lang ka tawo. Ini ang nangin pamaagi ni Mayor Albee Benitez para malikawan dala pauli ang mga salakyan sang siudad matapos nga ma diskubrehan nga may missing nga mga salakyan sadto.