Sumugod subong nga adlaw kinahanglan na ang isa ka persona nga magpa-register sa BaCTrac system sang Bacolod City bilang requirement sa pag-issue sang medical certificate sa iya sang City Health Office.
Ini ang bag-o nga pagsulundan nga ginpatuman sang Bacolod Emergency Operations Center para mangin mahapos ang pag contact trace sa isa ka persona sa ti-on nga magpositibo siya sa COVID-19.
Ang medical certificate ang isa sa mga requirements sa pagkuha sang Travel Authority agud nga makapadulong sa iban nga mga lugar ang mga gikan sa Bacolod.
Wala na sa karon nagapangayo sang chest x-ray ang CHO para mag-issue sang medical certificate bangud suno sa kay OIC City Health Officer Dr. Edwin Miraflor Jr. indi ini maka-detect sang virus.
Magluwas sa BaCTrac registration, magapaidalum na lamang sa health evaluation sa CHO ang mga magakuha sang medical certificate.
Gindugang pa ni Miraflor nga magapangayo lamang ang CHO sang chest x-ray sa mga special cases kag maga-depende sa health assessment sang aplikante.