Bacolod Yuhum Foundation nag-submit sang liquidation para sa committee hearing sang konseho sa Agosto 14.
Gin-reschedule ang committee hearing sa konseho sa Agosto 14, matapos wala man makatambong ang bag-o nga presidente sang Bacolod Yuhum Foundation nga si Kayte Matiling sang Lunes.
Suno kay Matiling natabuan nga ginkinahanglan niya nga maupdan ang iya anak nga nangin 3 gold medalist sa swimming competition sa Palarong Pambansa sa Marikina City.
Ginsiling ni Matiling nga na-submit na sang foundation ang liquidation report sa komitiba.
Iya man ginpaathag nga ang paghinyo nila sang supervisory powers gikan kay Mayor Albee Benitez ang magahatag sa ila sang authority para sa pagpatuman sang road closures, pagpatigayon sang events kag pagdumala sang mga kiosks sa festival sites para sa Masskara Festival 2023.
Ginsiling man ni Mate Espina, spokesperson sang Bacolod Yuhum Foundation, naglab-ot man sa kapin P80 million pesos ang kabilugan nga income sang MassKara Festival gikan sa sponsorships kag events sang nagligad nga MassKara celebration.
Sa Oktubre 6 ang salubong party para sa pagbukas sang MassKara Festival sa Oktubre 7 tubtob 22.