Nagpasa sang isa ka resolution ang Sangguniang Panlungsod sang Bacolod City agud pamatukan ang ginaduso nga gun ban para sa MassKara Festival.
Ginsiling ni Councilor Al Espino nga sang gintalakay sa SP ang nasambit nga resolution, kag wala sang may nag kontra diri.
Suno kay Espino, indi sabat sa kakulangan sang law enforcement ang pagpatuman sang gun ban. Indi man dapat ang mga legal gun owners ang mag sakripisyo suno sa iya agud mapunggan ang mga illegal gun holders.
Dugang niya, indi threat sa public safety ang pagdala sang armas sang mga legal gun owners bangud naglabay sila sa insakto nga proseso kag may permit sila.
Ginahaylo man sang SP ang Bacolod City Police Office nga sa baylo sang pagpatuman sang gun ban mas pasangkaron na lang ang police visibility kag intelligence operations sa mga festival sites agud malikawan ang posible nga kinagamo.
Sa Bacolod City, suno kay Espino may masobra sa 20,000 ka mga indibidwal ang lisensyado nga gun owners, lakip na ang iya kaugalingon.
Oktubre 15 tubtob 18 ang ginaduso sang BCPO agud mapatuman ang gun ban, apang ang LGU na ang ma apply sini sa national headquarters sang PNP.
Sa karun wala pa sang kumpirmasyon gikan sa LGU kun nag-apply sila sang gun ban ukon wala.
May masobra sa 3,200 ka uniformed personnel ang iga-deploy sang siudad para masiguro ang peace and order sang ika 47 nga MassKara Festival nga nagsugod na sini nga adlaw.
[sibwp_form id=1]