Biyernes sang aga, amat-amat na nga ginapangkakas ang mga tabon sa palibot sang Bacolod City Public Plaza bilang pagpanghanda sa nagahilapit na nga pagbukas sang ika 47 nga MassKara Festival.
Ginsiling ni Atty. Marty Go, Secretary to the Mayor, nga sa masunod nga semana pagabuksan na ang plaza.
Suno sa iya nakigsapol na ang Bacolod Gugma Foundation Incorporated sa Tourism Infrastructure and Enterprise Zone Authority ukon TIEZA nga amo ang naga rehabilitate sa plaza.
Isa sa mga ginkasugtan amo nga kakason na ang mga board ups sa palibot, apang may mga porsyon sang plaza nga naga atubang sa San Sebastian Cathedral ang magapabilin nga sirado bangud sa nagapadayon pa nga pagkaayo.
Dugang ni Go, halos patapos naman ang pag rehabilitate sang plaza kag may mga bag-o na nga suga nga gintakod agud mas mangin masanag ini.
Amat-amat na naman nga ginapatukod ang mga kiosk sa palibot sang plaza kag magabukas ini sa Oktubre 1 tubtob Oktubre 18.
Samtang, Huwebes nga adlaw, ginpang-inspect na sang nagkalain-lain nga ahensya kaupod ang Gugma Foundation ang duha ka carnival sites agud masiguro nga safe ini kun gamiton na sa tion sang festival.
Ginsiling ni Rodney Mitz Ascalon, MassKara Festival Director, ginpasiguro nga safe ang tanan nga rides sa carnival agud malikawan ang mga aksidente kaangay sang natabo sang tinalikdan nga tuig.
Ang carnivals ang nahamtang sa likod sang Bacolod City Government Center kag sa dalan sang Fr. Ferrero malapit sa Manokan Country.
Ginahulat nalang sang Gugma ang clearance gikan sa Sangguniang Panlungsod agud magsugod na ang operasyon sang duha ka carnivals tubtob sa katapusan sang MassKara Festival.
[sibwp_form id=1]