Ginatun-an na sa karun sang siudad sang Bacolod ang posibilidad nga mag-hire sang pribado nga mga security guards agud magbulig bantay sa Bacolod Public Plaza, Bacolod City College, kag mga pampubliko nga patyo.
Ini bangud ginakulang sang personnel ang Public Order and Safety Office ukon POSO sang siudad sa pagbantay sang amo nga mga lugar.
Ginsiling ni Patrick Halili, pamuno sang POSO, nga indi nila masarangan nga bantayan ang public plaza bangud apat lamang ka personnel ang nagalibot kun aga kag lima naman kun gab-i.
Suno sa iya, nagligad nga bulan, may duha ka sako sang wire gikan sa ginakay-o nga area sang plaza ang ginkawat. Ini ang isa man sa rason kon ngaa ginapangabay nila nga madugangan sila sang pwersa.
Nag-ayo naman ang siudad sa Bacolod City Police Office nga pasangkaron man nila ang police visibility sa plaza kag mga mayor nga lugar sa Bacolod.
Dugang ni Halili, may kabudlayan man sila sa pagsaway sa mga rugby boys sa lugar bangud nagabato man ang mga ini. Kada gab-i nagalibot ang Anti-Mendicancy Division sa plaza agud madakop sila, apang gilayon man in nga ginapangbuy-an bangud wala sang otoridad ang siudad nga mag-hold sa ila.
Siling naman ni Atty. Mark Mayo, City Administrator nga ginatun-an na sang siudad ang posibilidad nga magbutang sang pribado nga mga guwardiya sa mayor nga mga lugar agud masiguro pa gid ang safety sang publiko.
[sibwp_form id=1]