Ginasugdan na sang IJG Realty and Development Corporation ang construction sang isa ka merkado sa duta sang pamilya Gonzaga sa likod sang Bacolod City Government Center.
Sa idalum sang kasugtanan sang siudad kag sang pribado nga korporasyon, ipahamtang diri ang mga vendors sa palibot sang BCGC.
Lakip diri ang Bacolod Alliance of Small Entrepreneurs, Bacolod Dry Goods Association, BCGC Unity Vendors, Micro Bacolod Vendors Organization, kag walo ka Blind Massage Organization nga nagaplastar sa BCGC kun gab-i.
Ginsiling ni Bacolod City Administrator Atty. Mark Steven Mayo, indi magnubo sa 100 pesos kada 6 square meters ang bayaran sang tagsa ka vendor nga luyag mag-renta sa amo nga merkado.
Masobra sa 100 ka mga vendors ang sarang nga ma-accomodate sang amo nga lugar nga magabukas lamang kada las 3 sang hapon tubtob las 12 sang kaagahon.
Ginapaabot nga magabukas ini antes pa magsugod ang MassKara Festival sa Oktubre.
Damlag pa ginapahalin sang siudad ang mga vendors sa palibot sant BCGC bangud nagalapas ini sa kasugtanan sang LGU kag sang Pamilya Gonzaga, nga kinahanglan wala sang business activities sa palibot.
Ang pamilya Gonzaga ang nagapanag-iya sang duta nga ginatindugan sang BCGC.
[sibwp_form id=1]