Ginpanindugan sang siudad sang Bacolod nga magapabilin sa North Capitol Road ang 42 ka mga vendors nga may mga special permit, sandig sa City Ordinance 1009 nga nagatugot sa pagbaligya sa amo nga lugar humalin las 6 tubtob las 10 sang gab-i.
Ini kasunod sa pangabay ni Negros Occidental Provincial Legal Officer Atty. Alberto Nellas Jr., nga kakason ang amo nga mga vendors bangud nagatuga ini sang traffic kag obstruction sa dalan.
Ginsiling ni Bacolod City Administrator Atty. Mark Steven Mayo, magapadayon ang implementasyon sang ordinansa bangud may basehan man ini.
Pagklaro niya, ang 42 ka mga vendors nga may special permit ang lunsay food vendors.
Damlag pa, may pila ka mga ukay-ukay ang nakita sa amo nga dalan nga nagaplastar man kun gab-i kag suno kay Mayo, ila ini kadtuan agud pahalinon. Samtang ang mga lamesa sang vendors nga yara na sa dalan ang indi pwede suno sa iya.
Miyerkules sang aga, nagpatigayon sang flushing ang siudad agud mapabilin ang katinlo sang amo nga dalan.
Dugang naman ni Bacolod City Legal Officer Karol Joseph Chiu, kutob sa mga vendors nga may permit pero wala nagasunod sa patakaran sang siudad, ang mahimo nga mabawian sang permit.
Suno sa iya, wala sang laye nga ginalapas sang siudad kag iya mismo nga katungdanan ang depensahan ang otoridad sang Sanguniang Panlungsod sa pag-regulate sang mga dalan sa Bacolod City.*
[sibwp_form id=1]