Bacolod LGU nagsapol para mapabaskog ang pagpatuman sang precautionary measures batuk sa Mpox, pagtukod sang Task Force ginduso.
Ginkumpirmar ni Iloilo Provincial Health Officer Dr. Maria Socorro Quiñon ang una nga kaso sang Mpox sa probinsya sang Iloilo.
Kahapon ginkumpirmar man sang Iloilo City Health Office ang nahauna nga kaso sang Mpox sa siudad.
Tungod sang duha na ka mga kumpirmado nga kaso sang Mpox sa kaiping nga siudad kag probinsya sang Iloilo, nagsapol sanday Bacolod Acting-City Mayor El Cid Familiaran upod sa City Health Office kag mga natungdan nga city department agud mapabaskog ang precautionary measures batuk sa Mpox kag iban pa nga sahi sang notifiable diseases kasubong sang glanders disease.
Ang Mpox isa ka sahi sang makalalaton nga masakit nga pila sa mga sintoma ang pag-angkon sang pasyente sang rashes ukon skin lesions, pag palanakit sang kalawasan ukon ulo kag paghilanat.
Ang Mpox naga lapta paagi sa skin to skin contact, kasubong man sa mucosal lesions kaangay sang paghalok, pag pakighilawas kag respiratory secretions.
Ginpahayag ni Familiaran nga iya ginduso ang pagtukod sang task force nga magatutok kuntani sa mga kasubong nga balatian.
Pero nagapati ang CHO nga sa karon mas naga kaangay tagaan anay sang atensyon ang pagpabaskog sang public advisory agud nga mas mapabaskog man ang monitoring kag pagpaiway sang paglapta sang balatian.
Gindugang ni Familiaran nga subong indi pa kinahanglan ang pagpatuman sang border control ukon border inspections ilabi na sa mga points of entry kasubong sang sea ports kag bus terminals.