Bacolod LGU nagapanindugan nga clean title ang ila gina-uyatan rason nga wala sila sang nakita nga bayolasyon sa pagpatuman sang rehabilitation kag improvement sa daan nga city hall sang siudad.
Nanindugan si Mayor Albee Benitez nga wala sang nabuhat nga bayolasyon ang siudad sa pagpatuman sang rehabilitation kag improvement project sa daan nga city hall sang Bacolod sa dalan Luzuriaga.
Ini sa pihak sang napasaka nga kaso angut sa annulment of title sang nagapakilala eridero sang Pamilya Luzuriaga sa titulo nga natukuran sang daan nga city hall.
Ginpaathag sang alkalde nga clean title ang ila nabasehan nga dokumento.
Ang City Legal Office ang naghinyo na sang assistance gikan sa Provincial Government of Negros Occidental may angut sa deed of sale sang propiedad nga na-acquire sang Bacolod LGU halin sa probinsya.
Damlag pa, gina-kwestyon sang anay konsehal ang pag-demolish sang daan nga city hall.
Pero ginpaathag ni City Legal Officer Romeo Carlos Ting, Jr., nga wala ginkabig nga cultural heritage ang dilapidated building magluwas lang sa Fountain of Justice nga wala gintandog bangud ini lamang ang ginakilala nga heritage site sang National Historical Institute.
Para naman sa alkalde wala siya sang nakita nga rason para indi padayunon ang proyekto nga iya ginapaabot magahatag sang dugang nga atraksyon kag economic development sa Bacolod.