May masobra sa dose mil ka mga pumuluyo sa Negros Occidental ang apektado sang tubig baha dala sang mabunok nga ulan tuga sang bayo Paeng.
Sa report sang Provincial Social Welfare and Development office, as of 2pm sang October 28, 12,847 ka mga pumuluyo ang na displace bangud sang pag baha. Wala sila sa mga evacuation center. Ang mga apektadto nga pumuluo ang gikan sa Moises Padilla, San Carlos City, Calatrava, EB Magalona, Bago City, Valladolid kag Hinoba-an.
863 naman suno sa PSWD ang yara sa mga evacuation center.
Sa 2pm nga Tropical Cyclone Bulletin sang Pag-Asa napaidalom na sa Tropical Cyclone Wind Signal Number 1 ang Negros Occidental kag Oriental.
Sa Western Viasayas nalakip man sa TCWS Number 1 ang Guimaras, Aklan, Antique, Capiz, kag Iloilo.
Napaidalom naman ang Negros Occidental sa red alert. Suno kay Governor Eugenio Jose Lacson ipatuman ang pre-emptive ukon forced evacuation kun gina kinahanglan.
Padayon ang panawagan sang otoridad nga mag aligmat labi na sa pagbaha kag landslide tuga sang mabunok nga ulan.
15 ka mga LGU ang nag suspend sang klase kag may mga banwa naman kag siudad nga nagdeklara sang work suspension sa government offices sang Biyernes.
Ang siudad sang Bacolod, Victorias, Silay kag banwa sang EB Magalona ang nalakip sa mga nag deklara sang work suspension.